Nalunaq AEX-ip kuultinik suliniutaanut allanut aallarniutaassaaq
AEX Gold aalajangiisuussappat Napasorsuup Qooruani kuultisiorfik Nalunaq 2021-miit qaartiteraluni kuultisiorfigeqqinneqalissaaq, tassanimi suli minnerpaamik 8 tonsinik kuulteqarmat.
Kuultimilli sinneqartoorutit aningaasaliisunuinnaq nakkartinneqassangillat. AEX-imut tungaviussaaq, kuutisiornermik ingerlatsisoq nutaaq maani nunatsinni kuultinik suliniutinik allanik ingerlatsisinnaaniassammat.
Eldur Olafsson, AEX-imi Pisortaanerusoq oqarpoq.
- Piiaaneq ingerlallualerpat aningaasat ingerlallualissapput – ajunngitsuussappat sinneqartoorutaallutik – taakkulu kuultisiornernut amerlanernut ilaatigut atorneqarsinnaapput, Eldur Olafsson oqarpoq.
• 22. februar 2017 tunngavilerneqarpoq.
• Toronto-mi qullersaqarfeqarpoq.
• TSX-imi Canadami pappiaqqanik nalilinnik nioquteqarfiit annersaanni allatsinnikuuvoq.
• Kalaallit Nunaanni kuulteqarfinnik suliaqarneq pingaarnertut sammisaraa.
• Piginneqatigiiffik imminut atasoq Nalunaq A/S 100 procentimik pigisaraa, taassumalu Nalunaq-mut, Vagar-imut aamma Taartoq-mut aatsitassarsiornissaq akuersissuteqarfigaa.
Najoqqutat: AEX Gold, TSX.
AEX Gold tassaavoq suliffeqarfik kuultisiornermik siunertalik nutaaq 2017-imi tunngavilerneqartoq. Taamaattumik suliffeqarfik Kalaallit Nunaanni kuultisiornermik misilittagaqanngilaq, Nalunaq-milli misilittakkat tamatumunnga iluaqutaajumaarput.
- Kujataani kuulteqarfiup qeqqani inissisimanerup sumiiffinni allani ujarlernissamut assorsuaq iluaqusissavaatigut, Eldur Olafsson oqarpoq.
Tassani kuultisiorfiusussatut suliniuteqarfiit Vagar aamma Taartoq AEX-ip aamma aatsitassarsiorfissatut akuersissuteqarfigisaai Eldur Olafssonip innersuussutigai.
AAMMA ATUARUK Nalunami kuultimik nassaartoqarnissaa siunissamut aalajangiisuussaaq
AEX: Kuultisiornernik suliniutit Kalallit Nunaat iluaqusissavaat
AEX Gold Nalunaq A/S-imik, tassaasumik piginneqatigiiffik imminut atasumik, piginnittuuvoq. Kuultisiornermiksuliniutinut Eldur Olafssonip taasaanut Nalunaq A/S akuersissutinik piginnittuuvoq.
Naak AEX Gold canadamiut suliffeqarfiutigigaluaraat Eldur Olafsson qularnaveeqqusiivoq suliffeqarfiup kuultinik piiaanerata inuiaqatigiit kalaallit iluaqusissagai.
- Naak suliffeqarfiuterput Canadamut atagaluartoq, suliffeqarfik Kalaallit Nunaanniittoq pigaarput, taassumalu akuersissut tigummisaraa, taamalu akileraarutit allarpassuillu akileqquneqartut akilertarpavut, Eldur Olafsson oqarpoq.
AAMMA ATUARUK Kuultisiorfiup ammaqqinnissaanut nunatsinnit Danmarkimiillu aningaasaliisut
Ingerlatseqatigiiffik Greenland Venture, Namminersorlutik Oqartussanit pigineqartoq Vækstfondenilu, danskit naalagaaffiannit pigineqartoq ataatsimoorlutik Nunatta kujataani Nalunami kuultisiorfiup ammaqqinnissaanut 15 millionit koruuninik aningaasaliissuteqarput.
Eldur Olafsson aamma oqaluttuarpoq AEX Gold-ip aatsitassarsiorfimmut atatillugu suliassat assigiinngitsut eqqarsaatigalugit sapinngisamik kalaallit suliffeqarfiutaat atortassagai. Tassani eqqaavai ilaatigut Air Greenland aamma Royal Arctic Line, angallassinernut atorumasinnaassagitik.
Eldur Olafsson naapertorlugu misissueqqaarnerup ingerlanneqarnerani suleqataasut 50 procentiisa missaat sumiiffimmi najugaqartuupput.
Akuersissutip atorneranut akiliutit aamma Kalaallit Nunaata pissarsiarisassavai, taakkulu tassaapput piiaaneq aallartinniariarpat akileraarutitut akiligassat.
AEX massakkut 40 missaannik sulisoqarpoq, Eldur Olafssonilu naapertorlugu sulisut affaat kalaaliupput. Suliffeqarfiup ammaaqqinnissamut piareersaatit annertusiineranut atatillugu sulisut aappaagu 60-inngornissaat ilimagineqarpoq.
Aatsitassarsiorfik Nalunaq kingullermik ingerlanneqarmat inuiaqatigiit kalaallit aatsitassarsiorfimmit qanoq isertitaqartigisimanersut KNR-ip paasiniarsimagaluarpaa, kisianni manna tikillugu suli paasissutissiissutigineqarsinnaasimanngilaq. Aatsitassanut Suliffeqarnermullu Naalakkersuisoq Erik Jensen aamma KNR-ip apersorusussimagaluarpaa nunatsinni annertunerusumik kuultimik piiaasoqarnissaq eqqarsaatigalugu Naalakkersuisut qanoq isumaqarnerat pillugu. Tamannali aamma ajornarsimavoq.
