17-iinnarnik ukiulik kisimi timmisartuaqqamik nunarsuarmik kaajallaasoq aqqusaartoq

- Kisimiillunga timmisartorpunga, inuusuttut allanngueqataasinnaanerat, iliuuseqassagaanni 18-ilereersimasariaqannginneq, sinnattorisallu piviusunngortinneqarsinnaanerat inuusoqatinnut takutinniarlugu.

Mack Rutherford oqaluttuarisaarnermi inuusunnersaalluni 15-iinnarnik ukioqarluni timmisartortartunngorsimasoq, kisimiillunilu timmisartumik nunarsuarmik kaajallaasuni aamma inuusunnersaasoq, Narsarsuarmut sisamanngormat aggustip 18-nni aqqusaartoq taama oqarpoq.

Aqqusaarnini nuannaarutigigaa

Mack Rutherfordip nunatsinnut aqqusaarsinnaagami nuannaarutigeqalugu oqarpoq:

- Nuannaartorujussuuvunga, mikkiartorfinni avatangiiseq kusanangaarmat uppernanngingajapporluunniit. Narsarsuaq alianaalluinnarpoq. Mikkima inuit marluk utaqqivaannga, meeqqallu atuartut mittarfiup silataani tikilluaqqusiartortut nuannersorujussuarmik aamma oqaloqatigaakka.

Mack Canadami Goosebaymiit silagik eqqorluarlugu akunnerni tallimangajanni ingerlaareerluni Narsarsuarmut apuuppoq. Mackip oqaluttuaraa aleqami Zarap, oqaluttuarisaanermi arnani inuusunnersaalluni nunarsuaq timmisartumik ukioq manna januaarimi aamma kaajallassimagaa.

- 15-inik ukioqarlunga timmisartuaqqani pilotitut allagartaleqalerama sumut atussanerlugu eqqarsaatigisimavara, aleqamalu nunarsuaq kisimiilluni kaajallammagu aamma uanga taamaaliorusuttappunga. Ilaqutariinnit timmisartortuneersuuvunga, tassa angajoqqaakka tamarmik aleqara uangalu timmisartortartuuvugut.

Mackip aleqaa Zara Rutherford kisimiilluni timmisartumik nunarsuatsinnik kaajallaanermini nunatsinnut januaarimi aamma aqqusaarpoq. Taanna pillugu aallaaseriarput uani atuarsinnaavat.

AAMMA ATUARUK Timmisartortartoq 19-inik ukiulik nunarsuarmi rekordiliivoq: Qassiarsummi atuarfiup angalaneq malinaaffigaa

Aqqutaani misigisarpaasuit

Mackilu kaajallaanermini misigisarpassuaqarsimanerarpoq, misigisaminilu pissanganarnerpaat ilaannik eqqaasaqarpoq:

-Aqqutaani Japanimi Kushiromiit akunnerni qulini ataannartumik Alaskami Attu Islandimut timmivunga, russit Ukrainemut sorsunnerat peqqutigalugu Rusland qulaasinnaannginnakku, tassanilu Manerassuaq pissanganarsiungaatsialaarlunga qulaappara, Mack oqaluttuarpoq.

Mack Rutherford nunarsuarmik kaajallaassalluni aallartiffigisaminut Bulgeriamut qaammat una naalerpat apuutissaaq.