Timmisartortartoq 19-inik ukiulik nunarsuarmi rekordiliivoq: Qassiarsummi atuarfiup angalaneq malinaaffigaa
19-inik ukiulik Zara Rutherford Belgiamit-Tuluit Nunaanniit kingoqqisoq sisamanngormat Belgiami illoqarfimmi Kortrijk-Wevelgem-mi mippoq.
Qaammatit tallimat qaangiummata aamma tassanerpiaq nikorfavoq. Kingornatigummi piffissarujussuaq nuiassat akornanni atorsimavaa, nunarsuaq kaajallallugu timmisartornermini.
Tamannalu rekordiliineruvoq, taamaalioreernermigummi oqarsinnaalerami taamaaliortunit nukarlersaalluni. Kisiivimmi.
Timmisartortartup angalanermini katillugit 51.000 kilometerit timmisartuaqqamik Shark Ultralight-imik atilimmik angalasimavai nunallu 52-it aqqusaarsimallugit.
Nunanit taakkunannga 52-init ilaat ataaseq tassaavoq Kalaallit Nunaat aggustimi Narsarsuarmut miffigisaa.
Taamaalinerani Narsarsuup eqqaani nunaqarfimmi Qassiarsummi atuarfik, nunarsuarmi rekordiliinerit pillugit immikkut sammisaqarpoq, tassalu piffissakkut inissisimanera nunaqarfimmi meeqqanut naleqanngivilluni.
Timmisartortartup inuusuttup malinnaaffiginissaanut tamanna periarfissatsialaavoq, Ninna Ottosen atuarfimmi tuluttoortitsisoq isumaliorpoq.
Atuartuutinilu arfinillit Ninna Ottosen Zara Rutherford Narsarsuarmiitillugu videokkut oqaloqatiginissaanut iluatsitsipput .
Atuartut ilaatigut angalanera allallu pillugit apersuinissaminnut periarfissarsipput.
Zara Rutherford Qassiarsummi atuaqatigiinnik atassuteqartoq. Assiliisoq: Ninna Ottosen.
- Zara Rutherfordip niviarsiaqqat arnallu inuusuttut kaammattorpai anguniakkaminnik aallusseqqullugit, assersuutigalugu oqaluttuaraa inuutissarsiutigalugu (namminersortut aaqq.) timmisartortartut 5 procentiinnaat arnaasut, qarasaasiatigullu ilisimatuussutsikkut 15 procentit arnaallutik. Takutikkumavaa arnat aamma sapinngimmata.
- Suugaluarpallu arnat anguniakkatik angusinnaavaat, assersuutigalugu nammineq silaannarsualiartartunngorusuppoq. Inuttaa alutornaqigami, Ninna Ottosen oqarpoq.
Atuartut nunat allat pillugit ilikkagaqarnerupput
Zara Rutherford Narsarsuarmit tingeqqikkami Qassiarsummi atuarfik qarsuppaa. Kingornatigut atuaqatigiit angalanera inuit attaveqaqatigiittarfiisigut timmisartortartullu nammineq nittartagaani malinaaffigaat.
- Atuartut torragerpaluttaqaat, soorlu nukappiat Zarap timmisartua soqutigivaat, taava niviarsiarartaat malunnarpoq inuttaa assut torragigaat, soorlu oqartarput ’’She’s so cool’’ (pikkunaqigami, aaqq.), tulluusimaarnarparsippoq.
- Zarap angalanerani atuartut arlalinnik ilikkagaqarput. Ruslandimi apersorneqarami tusarnaaratsigut paasivaat nunarsuup ilaanni tuluttut oqalussinnaanngitsuni nunaqarfeeraq inuit 100 missaaninik inulik uninngaffigisimagaa,pisiniaraangami tikkuarteriinnartarsimalluni, tamakkua aamma soqutiginartarput nunarsuarmi pissutsit qanoq ittuunersut paasisaqarfigissallugit.
Sisamanngormat Zara Rutherford Belgiamut, angalanermini aallartiffimminut, nunnippoq, atuartulli atuarfimminniit malinnaaffigisinnaanngilaat corona pissutigalugu matoqqammat.
Kisianni atuarfik ataasinngorpat ammaqqissaaq Ninna Ottosenilu oqaluttuarpoq piffissaqassagunik atuartut Zara Rutherford pillugu allagartarsualiatik naammassiniaraat nalunaarfigalugulu.
