Anna Wangenheim Steen Lyngelu Inatsisartunit sulinngiffeqartut

Demokraatinit marluk Inatsisartunut Anna Wangenhemip Steen Lyngellu Inatsisartunit sulinngiffeqarneranni ilaasortanngussapput.
Demokraatinit Inatsisartunut ilaasortanngortut Inatsisartut ataatsimiinnerini takussaalissapput. Assi © : KNR / Malik Brøns
Allattoq Ivik Kristiansen
septembarip 25-at 2020 13:52

Demokraatinit Naalakkersuisunut ilaasortat marluk, Anna Wangenheim Steen Lyngelu, Inatsisartuni atuuffimminnit sulinngiffeqarput.

Inatsisartut siulittaasuat ukiakkut ataatsimiinnerup ammarneqarnerani taama nalunaaruteqarpoq. Tassalu Demokraatinit sinniisut marluk, Bo Martinsen Rachel H. Ingemannilu Inatsisartunut ilaasortanngortussanngorput.

Taakkulu Inatsisartunut aatsaat ilaasortaalerput.

Bo Martinsen Demokraatit politikkiata ilaanut isumaqataanani Sermitsiaq.AG-mut siusinnerusukkut oqarpoq, sumulli isumaqataanani annerusumik oqaatiginagu. Demokraatinulli sivikinnerpaamik qinigaaffiup naanissaanut ilaasortaaginnarnissani Sermitsiaq.AG-mit apersorneqarnermini neriorsuutigaa.

Bo Martinsen Inatsisartunut 2018-mi qinersinermi 51-init taaguunneqarpoq, Rachel H. Ingemannilu 36-nit taaguunneqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq