”Unnu'manna tassaavoq, piorsarsimassuseq, nunatsinnilu pisut sammillugit aallakaatitassiaq immikkoortunut marlunnut avitaq katillugu 55 minutsinik sivisussusilik. Aallakaatitsivitsinni pulaartoqaatigaluta ilanngutassianik takusaqartassaagut sinerissamiillu oqaloqateqartassalluta. Unnu`mannarmiut: Pipaluk Egede Poulsen, Katrina Lindberg Boassen aamma Hans Jukku Noahsen.
Sammisaq: Unnumanna Nuup kangerluaniit aallakaatitsissaagut. Tassa Kapisillit akianiippoq Neriunaq - nunatsinni savaateqarfik avannarpasinnerpaaq.
Tassani najugaqarput Angutimmarik Hansen ilaquttanilu.
Angutimmarik kujataani savaateqarfimmi peroriartorpoq, 2018-imilu Neriunami savaateqalerluni.
Ilaqutariit ullumikkut 300 sinnerlugit savaateqarput, Kapisilinni kioskiuteqarlutik, takornarialerisarlutik, assigiinngitsorpassuarnillu ingerlataqarlutik - saniatigullu sisamanik meeraqaramik perorsaallutik, Kapisilinnilu aamma sunniuteqaqataallutik.
Taakku ulluinnarni inuunerat qanimut misigissavagut.
