Qaqortumi taxartartoq aallaammik ummiunneqartoq: Angutit marluk tigusarineqarput

Qaqortumi angutit marluk ullaap tungaani politiinit tigusarineqarput, Kalaallit Nunaanni politiini pigaartunut ittuusoq Carl Svær tusagassiutinut nalunaarpoq.

Qaqortumi politiit ullaaq 07.57 Nuiariami paggittoqarnera pillugu kalerrinneqarput. Pagginnermut isiginnittoq tamatumalu nalaani najugalik tamatuminnga kalerriivoq tassa angutit marluk 20-t missaanni ukiullit pingajullit matumani kalerriutigineqarlutik.

Taama kalerriisoqarsimatsiareernerata kingorna politiit aamma taxartitsisumit kalerrinneqaqqipput, taassumalu aallaammik ummiussisoqarnera pillugu kalerriutigaa.

- Angutit marluk 20-t missaanni ukiullit taxartitsisoq aallaammik ummiussimavaat, taxartitsisorlu qimaasimavoq, politiini pigaartunut ittuusoq Carl Svær oqaluttuarpoq.

Angutit taakku marluk taxamik aallarussisimanngillat, Politiillu suli naluaat taama aallaammik qunusaarisoqarneranut suna patsisaasimanersoq.

Politiit pisoqarfiusoq taxat uninngaffigisaat unguaat, taamatuttaaq angutit angerlarsimaffigisaat aamma ungullugit, taama pisoqarmat angutit marluk politiinut tunniutiinnarput.

Nalunaaqutaq 10.35 politiit angutit tigusaraat, taakku qunusiarinnissimanertik tigusaassutigigaat politiit oqarput nangillutillu oqaluttuarput angutit marluk taakku maanna politiinit nakkutigineqartut misissueqqissaarnerlu maanna aallartinneqartoq.

Politiit maanna pisumi tassani inuit pingajuat aqqusinermilu Nuiariami paggittoqarneranut akuusoq killisiuleruttoraat, Carl Sværip ilisimatitsissutigaa.