Meeqqat pisinnaatitaaffii ataatsimiissutigineqassapput
Meeqqat pisinnaatitaaffii nunarput tamakkerlugu ukiormanna decembarip arfineq pingajuanni ataatsimiissutigineqassapput. Ilaqutariinnermut Pisortaqarfiup aaqqissuussaanik illoqarfinni tamani meeqqat inersimasullu aliikkusersuinertalinnik ataatsimiitinneqassapput.
Naalagaaffiit Peqatigiit meeqqat pisinnaatitaaffii pillugit aalajangersagaat, taakkualu nunatsinni qanoq atuutsinneqarnerat ataatsimiinnermi sammineqassaaq.
Meeqqat eqqarsaatigalugit ataatsimiinnerit sivisunnginnissaat Ilaqutariinnermut Pisortaqarfimmit innersuussutigineqarpoq.
’Meeqqat pisinnaatitaaffii’ pillugit taama ulloqartitsinerup kingorna nalunaarutit imaqarniliallu nunarput tamakkerlugu suliarineqartut Ilaqutariinnermut Pisortaqarfimmut nassiunneqassapput, pisortaqarfimmi isumassarsiorfigineqarsinnaaniassammata.
