"Explorer" kivivoq issimasuili tamarmik annaanneqarput

Takornariat umiarsuarsuat Explorer Sikuijuitsoq Kujallermi ilulissamut aporeerluni kivisoq, isumannaallisaanissamut 1969-imi maleruaqqusat atuuttut malillugit sanaajusimasoq paasineqarpoq, taamaatuumillu maleruaqqusat ullumikkut atuuttut sukanganerujussuillu malinneqarsimanngitsut, aviisi politiken.dk allaaserinnippoq.

Umiarsuarsuup ukiunik 40-nik pisoqaassuseqarnera aamma pissutaaqataasimassasoq, civilingingeniør Hans Otto Holmegaard Kristensen, Danmarkimi umiarsualiornermut tunngasuni suliaqartarfimmi Skibsteknisk Selskab-imi generalsekretæriusoq oqarpoq. Taanna aamma umiunermut tunngasunik immikkut ilisimatusarsimasuuvoq.

'Explorer'-ip Antarktis-imi unnuaq kivisup ilaasui 91-it, angallassisui qulingiluat inuttaalu 54-it tamarmik Norgemiut umiarsuaannit annaanneqarput.

'Explorer' siornatigut uparuarneqartareerpoq, soorlu Chile-miitilluni marsip qaammataani aamma Skotlandimiitilluni maajip qaammataani. Uparuaanernut tunngaviupput annaassiniarnermi qanoq iliornissamut malittarisassaqannginnera, annanniutit nakkutigineqarsimannginnerat, umiarsuup matuisa ussiitsuunerat aamma ikuallattoqalissagaluarpat isumannaallisaanerit naammannginnerat.