KNR-ip siunissaa pillugu ataatsimiititaliortoqaqquaat
Isumasioqatigiissitsinermi Kalaallit Nunaata Radioani siulersuisut siulittaasuat Juaaka Lyberth oqarpoq, innuttaasunik sullissinermut atatillugu ataatsimiititaliamik kommissioniliortoqassasoq.
- Angorusunnassaaq naalakkersuisutigoortumik, kommissionimik pilersitsinissaq. Kommissionip taassuma siunertarissavaa, naalakkersuisut isumaliutissiissummik saqqummiinissaat, inatsisartut 2009-mi ukiaani ataatsimiinneranni imaluunniit 2010-mi upernaakkut ataatsimiinneranni saqqummiunneqartussamik.
Isumaliutissiissut taanna KNR-p siunissami qanoq iluseqarluni ingerlariaqqinnissaanik tunngaviliisuussaaq, Juaaka Lyberth oqarpoq.
Peqqissutsimut, Avatangiisinut Pinngortitamullu naalakkersuisoq Arkalo Abelsen isumaqataavoq, neriorsuutigaalu siunnersuut naalakkersuisunut apuunneqassasoq.
Inatsisartunut ilaasortaq kulturimullu ataatsimiititaliami siulittaasup tullia Ruth Heilmann aamma isumaqataalluni oqarpoq.
KNR-ip kalaallisut oqaasertalinnik amerlanernik aallakaatitsisalernissaa anguniagassanuttaaq ilaavoq. Pingaartumik aallakaatitassianik sinerissaminngaanneersunik.