Tiigerit tiigereqatertik nerigaat

Uumasuusivissuaq namminersortumit pigineqartoq Shenyang Glacier Zoo, Kinap avannaani kangianiittoq aningaasaqarniarnikkut ima ajornartorsiuteqartigaaq, allaat uumasunut nerisassaqartitsiniarneq ajornartorsiutaalluni.

Kinamiut nutaarsiassaqartitsiviisa nassuiaataat taamaappoq, sapaatip akunnerata naanerani Sibiriap tiigeriisa sisamat ilartik toqoriarlugu nerimmassuk.

Tiigeri toqutaasoq, ilani sisamat assigalugit, aqqaneq marlunnik ukioqarpoq, taakkualu tiigerit ukiut tallimat ataatsimoorlutik uumasuupput.

Fan Zhiyong-ip, Pinngortitaq pillugu Nunarsuaq tamakkerlugu suliniaqatigiiffimmeersup, tiigerinik ilisimasallip, uumasuusivissuarmi pisortat pisimasumut pisuutippai.

- Pisimasoq alianartoq, tassa tiigerit tiigereqatiminnik nerisarnerat tusarneq ajoraluarparput. Tassami pinngortitami qaqutigorsuaq taama pisoqartarmat, oqarpoq.

Li Wenshui, uumasuusivissuarmi pisortap tullia oqarpoq, aningaasarliorneq pissutigalugu uumasuusivissuup ukiuni kingullerni marlunni tiigerit iluamik nerisassaqartittarsimanngikkai.

Xinhua, Kinami pisortat nutaarsiassaqartitsiviat allappoq, siorna nagguaatsup perlilersup inigisani aseroriarlugu qimaasimasoq.