-Meeqqat inuusuttuaqqallu inuuniarnikkut ajornartorsiuteqartut periarfissinniarlugit ikiorserniarlugillu inunnik isumaginninnermi oqartussaasut suleqatiginialersaarpavut. Tamatuma ilaatigut kingunerissavaa meeqqat taakkua piffissami sivikitsumi sivisunerusumiluunniit ajornartorsiutinit peersinneqartassammata, Bent Sand Tikiusaaq sinnerlugu oqarpoq.
Angajoqqaat suleqatigiit maannakkorpiaq qeqertani Qaqortumiit nalunaaquttap akunnerata affaata missaani imaatigut orninneqarsinnaasut ilaanni illuaqqanik mikisunik pissarsiniarnissaq pilersaarutigaat.
-Tassani assersuutigalugu lejrskoleqarnerit aaqqissuunneqarsinnaapput, aammattaarli ilaqutariit meeqqatik ilagalugit illuaqqani najugaqartarsinnaallutik – immaqa tarnip pissusaanik paasisimasalimmik suliamilluunniit ingerlatsisumik ilaqartillugit. Qaqortumi angajoqqaat suleqatigiiffiannit Tikiusaamit oqaatigineqarpoq, suliassat pisortanit taamaatiinnarneqarsimasut allatut suliniuteqarfigineqarnissaat kissaatigineqartoq.