Umiarsuarpassuit Sortehavimi umiupput
Inuillu maqaasineqartutut nalunaarutigineqartut amerlallutik.
Skrevet af Mads Lynge
11. november 2007 17:33
Imartap Sortehavip avannaq-kangisissortaani anorersuarpoq, immakkullu angallassineq eqqorneqarnerlulluni.
Umiarsuit ikinnerpaamik tallimat kivisimanerarneqarput, umiarsuillu sisamat Ruslandip Sortehavimut sineriaani maanna ikkarleqqapput. Sverigep nutaarsiassaqartitsivia taama ilisimatitsivoq.
Umiarsuit marluk illoqarfiup Sevastopolip ungasinngigisaani kivimmata inuttat 15-it Georgiameersut maqaasineqarput, russillu marluk ipillutik ajunaarsimallutik.
Umiarsuaq uuliamik assartuut napisimavoq, uuliarluertoqarporlu.
Krimip qeqertaasaata eqqaani umiarsuit pingasut allat kivipput, inuttallu arfineq-pingasut maqaasineqartutut nalunaarutigineqarlutik.
