Nipilersortartut peqatigiiffimmik tapersersuisut
Nipilersortartut tassaapput Henrik A. Broberg, HAP-itut nalunnginneqartoq, rappertartoq John Olsen, Nuuk Posse-meersoq erinarsortartorlu Juno Berthelsen. Erinarsuut internetikkut cd-tullu tuniniarneqassaaq, Nuuk TV-p videortassaa suliarissavaa, sinneqartoorutillu tamarmik peqatigiiffimmut ”Meeqqat Inuunerissut”-nut tunniunneqassapput. Nipilersortartut tusagassiuutinut ullumi taamatut nalunaarput.
- Maani eqqumiitsuliortut siunertanut ajunngitsunut tapersersuinissartik pikkoriffigivallaanngilaat, nunani allani piffissaq sivikitsuarannguaq atorlugu eqqumiitsuliortut sumi tamaanngaanneersut katersorneqartarput tapersersuillutillu immiussillutik. Nunatsinni takutittariaqarparput kulturimik suliallit aamma taamaaliorsinnaasut, Henrik Broberg oqarpoq.
Peqatigiiffimmit ”Meeqqat Inuunerissut”-miit suliariniagaq nuannaarutigineqarpoq, ullunilu makkunani peqatigiiffik suliniarluarpoq novembarip 14-ianni nunatsinni illoqarfinni arlalinni, meeqqanut atugassarititaasut pitsanngornissaat tapersersorniarlugu, akerliussutsimik takutitsinissanik aaqqissuussivoq. Peqatigiiffik aamma www.bedreboerneliv.skrivunder.dk atorlugu ”atsiornernik” katersivoq.
