Ilinniarnertuunngorniarfinni kalaallisut ilinniartitsisunik ilinniarsimasunik amigaateqarput
Nunatsinni ilinniarnertuunngorniarfinni kalaallisut ilinniartitsisut ilisimatusarfimmi ilinniarsimasut amigaataapput.
Qeqqani ilinniarnertuunngorniarfimmi Nuummiittumi kalaallisut ilinniartitsisut ilinniarsimasut amigaataapput. Nuummi ilinniarnertuunngorniarfimmi ilinniartitsisut amigaataalerneranut pissutaavoq kalaallisut ilinniartitsisut suliffeqarfinnut allanut atorfinissimaneri, suliffeqarfinni allani aningaasarsiagissaarneruneq pissutigalugu.
Qaqortumilu ilinniarnertuunngorniarfimmi HHX-mi kiisalu Sisimiuni HTX-mi kalaallisut ilinniartitsisut tamarmik ilisimatusarfimmi ilinniarsimasuungillat. Tamarmik ilinniarfissuarmi ilinniarsimasuupput, immikkullu ilinniarnertuunngorniarfimmi ilinniartitsisuunissaminnut akuerisaallutik.
Avannaani ilinniarnertunngorniarfimmi kalaallisut ilinniartitsisut pingasuupput. Taakkunanilu ilinniartitsisoq ataaseq ilisimatusarfimmi kalaallisut qaffasissumik ilinniarsimasuuvoq.
Ilinniarnertuunngorniarfinninngaaniit oqaatigineqarpoq fagit allat ilinniarsimasunik atorfigineqartut, kisiannili kalaallisut ilinniarsimasunik ilinniartitsisoqarnissaq ajornartorsiutigineqarluni.
