Birthe Rønn Hornbech: Namminersorneq Pillugu Isumalioqatigiinni ilaasortat ingerlaqqittariaqarput
Isumalioqatigiissitamummi ilaasortat pingasut Folketingimut qinigassanngorteqqinngillat, tassalu IA-meersoq Kuupik Kleist, Folketingimi siulittaasoq, Isumalioqatigiissitamilu siulittaasup tullia Venstre-neersoq, Christian Mejdal, kiisalu Frank Jensen Socialdemokratineersoq.
- Iluarnerpaajussagaluarpoq Partiit, Isumalioqatigiissitami ilaasortat, ministeriunerullu isumaqatigiissutigisinnaappassuk ilaasortat taarserneqaratik suliartik naammassiniassagaat, tassami iluarinngilara, ilaasortanik taarsersuinerup kingunerissappagu suliap naammassineqarnissaata kinguarsarneqarnera, Birthe Rønn Hornbech Sermitsiaq.gl-imut oqarpoq.
Naalakkersuisut siulittaasuat Hans Enoksen Radioaviisimut oqarpoq Birthe Rønn Hornbech taperserlugu, namminerli folketingimut siunnersuuteqarnissaminut pisinnaatitaanani. – Taamaattorli Namminersorneq Pillugu Isumalioqatigiissitami siulittaasut, ilaasortat nikisinneqannginnissaannik kissaateqarpata tapersersussavakka, Hans Enoksen oqarpoq.