CO2-mik aniatitsineq naalakkersuisunit annikillisaaviginiarneqarpoq
Silap pissusia pillugu Nunarput politikkeqalerpoq, tamatumalu piviusunngortinneqarnissaanut iliuusissamik pilersitsisoqartariaqarniarluni.
CO2-mik aniatitsinerup 2012-iutinnagu 8 procentimik annikillisarneqarnissaanut siunnerfik anguneqassappat maannangaaq iliuuseqartoqartariaqarpoq, avatangiisinullu naalakkersuisoq Arkalo Abelsen oqarpoq pilersaarutit 2008-p aallartisimalaarnerani saqqummiunneqarsinnaassagunartut:
- Silaannaap mingutsinneqarnerani suut annikillisarniartariaqarnersut isummersorfigissavarput naalakkersuisuni, naleqqussaasoqassallunilu. Naatsorsuutigaara ukiup uuma tullia aallartilaarnerani saqqummiunneqarsinnaassasut, Arkalo Abelsen oqarpoq.
- CO2-mik aniatitsinerup 8 procentimik annikillisaavigineqarnissaa annertuallaarsorinngilara, nunarsuarmioqatigummi piumaffigaagut ilungersorlutik silaannaap mingutsinneqarneranik annikillisaaqqullugit. Soorunami uagut aamma taamaaliortariaqarpugut. Pissanganaannarpoq suut aqqutigalugit anguniakkavut qanoq anguneqassanersut, kisianni pinngitsoorata peqataasariaqarpugut, avatangiisinut naalakkersuisoq oqarpoq.
Taanna Nunat Avannarliit ministeriisa aalajangersaasartuisa Oslomi sapaatip akunnerata tulliani ataatsimiilernissaannut peqataassaaq.