Qitinnermik ilitsersuisup Sylvia Cloutier-ip isiginnaagassiaa ”The Hunters Journey” – ”Piniartup angalanera”, qiteriaaseq nipilersoriaaserlu nutaaliaasut atorlugit piniartoq inuk ilaquttaminik nerisassaqartitsiniarluni piniartoq malittarineqarpoq.
Tassanilu pingaarnertut inuttarititap aapparaa Kalaallit Nunaanni inunngortoq, Laakkuluk Williamson.
TV-kkut nangeqattaartussiaq ”Dancing with Spirit”
- ”Anersaat qiteqatigalugit”, arfinilinnik immikkoortortaqarpoq, tassanilu nutaaliamik qangarnitsanillu qiteriaatsit akulerullugit nunap inuiisa anersaakkut toqqaviat takutinniarneqarpoq.
Laakkuluup qiteqataa akilinermiu inuk, Kakki Peter, qiteqamminik aviisimut CBC-Newsimut nersuinnippoq, kalaallit pissusitoqaannik qitinnerminnut akoorisimammat.
Kakki Peter nammineq affarmik kalaaliuvoq. Qitinnermik ilitsersuisoq Sylvia Cloutier, ukioq manna Nobelip eqqissineq pillugu nersornaasiuttagaanik nersorniarneqartunut ilaasup, Sheila Watt-Cloutier-ip panigaa.
Laakkuluk Williamson, kalaallip Carla Williamsonip, ukiorpaalunni Akilinermi najugaqarsimasup, panigaa.