Sulorartartut pissartanngorniutissapput
Nunat tamat sulorarlutik pissartanngunniunnissaat, taaguuserneqarsimasoq ’Air Greenland Island Badminton Event 2007’ oktobarip 17-anniit ulluni arfineq pingasuni Nuummi Illorsuaq Timersortarfimmi ingerlanneqassasoq, Kalaallit Nunaanni Badmintonertartut Kattuffianniit nalunaarutigineqarpoq.
Pissartanngunniunnissaq aasaq manna qeqertarmiut Rhodosimi unammersuarneranni sulorarnerup ilaatinneqanngitsoorneranut taarsiullugu ingerlanneqassaaq.
Taamatut aaqqissuussiniarnermi Kalaallit Nunaanni Badmintonertartut Kattuffianniit timersoqatigiiffik B 67 aamma Air Greenland suleqatigalugit nunatsinni pissartanngunniunnissamut qaaqqusisuuvoq.
Naak angalaniarnermut aningaasartuutit amerlagaluaqisut peqataaniarlutik nalunaartut 50-iupput qeqertanit ukunanngaanneersut: Falklandsøerne, Isle of Man, Savalimmiut, Gotland, Gibraltar soorunalimi aamma nunatsinneersut.
Pissartanngorniunneq qeqertarmiut unammersuarneranni unamminermi periaatsit malillugit ingerlanneqassaaq, taamaalilluni siullermik holdikkaarluni unammisoqassaaq kingornatigullu ataasiakkaarluni pissartanngorniuttoqassalluni.
Pissartanngorniutivinnerit KNR-TV-kkut toqqaannartumik aallakaatinneqassapput.
Kalaallit unammeqataasussat – katillugit quliusut – sapaatip akunnerani kingullermi Danmarkimi sungiusaqatigiipput.