Qaanaami isumasioqatigiipput

Qaanaap kommunia aamma Namminersornerullutik Oqartussat ullumi aqagulu inuutissarsiornikkut siuarsaanissaq pillugu isumasioqatigiissitsipput.

Kommunimi suliffissanik amigaateqarnerujussuaq isumasioqatigiinnermut pissutaavoq, soorluttaaq Qanoruukkut Radioaviisikkullu eqqaaneqareersutut, silap pissusaata allanngoriartornerata kingunerisaanik piniartutut inuuniarnerup ajornarsiartuinnarnera sammineqassaaq.

Kommunimiit inuussutissarsiutaasinnaasut allat ujartorneqarput, siunissamilu inuussutissarsiutigiligassatut piukkunnartut immikkut sammineqassallutik.

Inuussutissarsiornermik suliallit, Qaanaami suliffeqarfiit namminersortut pisortanillu ingerlanneqartut qaaqquneqarput kiisalu kommunimi nunaqarfiit tamarmik peqataatitaqarput. Inuit 50-it missaanniittut isumasioqatigiinnermi peqataasussaapput.