Ilinniakkat sorliit pingaartinneqassanersut eqqartorneqartariaqarpoq
Nunatsinni sulisinnaassuseqartut 75 procentii meeqqat atuarfiat kisiat naammassinikuuaat, naak nunatsinni ilinniaqqissinnaaneq periarfissanngornikuungaluartoq.
Ilisimatusarfimmi Lektorip Pia Vedel Ankersen-ip Ilinniakkat sorliit pingaartinneqassanersut ujartorpaa
-Ilinniagaqarnissaq sutigut tamatigut pingaartillugu iliuuseqartoqartariaqarpoq, soorlu politikikkut, meeqqat atuarfiini, meeqqallu perorsarneqarneritigut, Pia Vedel Ankersen oqarpoq. Taanna isumaqarpoq
Ilinniarsimasut amerlinissaat anguniarneqartariaqartoq tamannalu mianersuunneqarluni anguniarneqassasoq.
- Ukiut 30-t matuma siornatigutut meeqqat Danmarkimut atuariartortiinnapajullugit iliortoqassanngilaq, neriuutigalugulu ilinniarsimallutik uternissaat, tamannalumi Namminersornerullutik oqartussat eqqunneqarneratigut qujanartumik qimanneqareerpoq, nunatsinnilu ilinniarfissaasinnaasunik pilersitsisoqarluni. Pia Vedel Ankersen oqarpoq. Ilinniarsimasut amerlinissaat anguniaraanni aamma ilinniakkat suut amigaatigineqarnersut eqqumaffigineqartariaqarsoraa.
-Nunatsinnimi innuttaasut 56.000-iinnaapput, qaffasissumillu ilinniarfiusinnaasut tamaasa nunatsinni ilinniarneqarsinnaanngillat. Oqartoqartariaqarporlu ilinniakkat sorliit nunatsinni ilinniarfigineqassanersut, naggataatigullu akueriinnartariaqarparput ilinniartut ilaat Danmarkimut imaluunniit nunanut allanut ilinniariartortariaqarnissaat, Pia Vedel Ankersen oqarpoq.