MIPI-p nalunaarusiaa IA-p qisuariarfigaa
Ilaqutariit meerartallit aningaasanik amerlanerusunik atugassaqartariaqarput, taamaattumillu akileraarutinut akiliinnginnerminni annerusumik ilanngaateqartariaqarput. Akissarsiaqqortunerillu amerlanerusunik akileraartariaqarput.
Inuit Ataqatigiit taama isumaqarput, Inatsisartullu ukiakkut ataatsimiinneranni nunatsinni akileraartarnermik nutaamik aaqqissuussisoqarnissaa siunnersuutiginiarpaat.
IA-p siulersuisuuneri MIPI-p meeqqat piitsut pillugit nalunaarusiaa nutaaq taama qisuariarfigaat.
- Piitsuussuseq aamma meeqqat piitsuusarnerat akiorneqartariaqarput aamma atugarissaannginnerup kingornuttakkatut ingerlateqqinneqartarnera unittariaqarpoq. Akileraartarnermut, sulisartoqarnermut isumaginninnermullu politikkit atorlugit inuiaqatigiinni naapertuunnerusumik aningaasarsiornikkut ingerlatsisoqalernissaanut atorneqarsinnaapput, IA-kkut nalunaarumminni allapput.
Inatsisartut ukiakkut ataatsimiinneranni IA-p siunnersuutiginiarpaa meeqqat piitsuussusiat pillugu paasissutissat nutaat ilisimariikkallu tunngavigalugit Atugarissaartuuneq pillugu sukkasuumik suliaqartussamik misissueqqissaartussamik ataatsimiititaliortoqassasoq.