Peter Olsen: Pinngitsaalineqassanngilagut

Aalisarnermut pillugu naalakkersuisut inatsisissatut siunnersuutaat taamatut isikkoqartillugu akuerineqassagaluarpat aalisarneq nangiarnartumut inissinneqassasoq KNAPK-p siulittaasua Peter Olsen oqarpoq, nangipporlu:

- Pipallataavallaaqaaq sukumiinanilu:

- Inatsisissatut siunnersuut aasaq manna tusarniaassutigineqarmat qaammammik ataatsimik taamaallaat piffissalerneqarpugut. Sivikippallaarujussuarpoq. Inatsisissaq eqqissilluta atuartariaqarparput eqqarsaatigisariaqarlugulu. Suliassaq peqqissaarunneqartariaqarpoq, taamatut pinngitsaalineqarsinnaanngilagut, tuaviortumillu isummerfigisussaanagu, Peter Olsen oqarpoq.

Pisassiissutit suulluunniit Kalaallit Nunaanni najugartunut pisassiissutigineqartariaqartut KNAPk-mit oqariartuutigineqarpoq, sinerissallu qanittuani aalisartartut avataasiortartullu immikkoortinneqarnissaat piumasarineqarluni.

- Aamma sinerissap qanittuani aalisartartut nunamut tulaassisussaatitaanerat atorunnaarsinneqartariaqarpoq. Pinngitsaaliissummik tulaassissussaatitaanerat atorunnarsittariaqarpoq, Peter Olsen oqarpoq.

Aalisarneq pillugu Kommissionimik pilersitsisoqartariaqartoq Peter Olsenip oqaatigaa, susassaqartunillu tamanit inuttalersorneqarnissaa siunnersuutigalugu.