Sisimiuni toqutsisoqarneranut atatillugu tigummigallagassanngortoqarpoq
Sisimiuni toqutsinermut atatillugu angut Politiinit tigummigallarneqarpoq.
Skrevet af Oline I. Olsen
Angut inigisamini toqungasoq sapaatip akunnerata naanerani nassaarineqareersorlu angut tigummigallarneqalerpoq.
Toqusoqarsimatillugu paasiniaasartut misissuiartorlutik Sisimiunut tikereerput, politimesterillu tullersortaa, Morten Nielsen, taassuma saniatigut oqaaseqarusunngilaq.
Angut sapaatip akunnerini sisamani tigummineqarallassaaq.
Qaammatit arfineq-marluinnaat matuma siorna Sisimiuni aamma toqutsisoqarpoq, 29-nik ukiulik HTX-imi ilinniartoq, Louise Hegelund, kollegiami inigisamini toqungasoq taamani nassaarineqarmat.
Politiit qaammatini pingasuni taamani paasiniaapput.