Kalaallit Nunaata Savalimmiullu akunnerminni isumaqatigiissutertik annertuseqqammerpaat, nunani taakkunani inuussutissarsiornermut, ilinniarnermut ilisimatusarnermullu tunngasut suleqatigiissutigineqarnerulernissaat isumaqatigiissutigineqarluni.
Isumaqatigiissulli taanna Asii Chemnitz Narupimit amigaateqarsorineqarpoq, allaffissornikkut pisariillisaasoqarnissaa amigaataasorineqarluni.
Naalakkersuisulli siulittaasuat allatut nalunaaruteqarpoq:
- Ilisimasanik misilittakkanillu paarlaasseqatigiinnissaq isumaqatigiissummi ilaavoq, matumanilu Namminersornerullutik Oqartussani allaffissornikkut ingerlatsinerup aaqqissuussinerullu annikillisarlugu allanngortiterneranut, aasaq manna aallartinneqartumut tunngatillugu isumaqatigiissut pisariaqassappat atorneqarsinnaavoq, naalakkersuisut siulittaasuat Hans Enoksen erseqqissaavoq.