Air Greenlandimi saqisut sulinermik unititsinerat Air Greenlandp nammineq akilissavaa
Sapaatip akunnerani kingullermi Air Greenlandimi saqisut sulinermik unitsitsinerat timmisartuutileqatigiiffimmut ikinnerpaamik 4 millioni koruuninik akeqassaaq.
Naak Air Greenlandip pisortaata Michael Binzerip siusinnerusukkut saqisut isumaqatigiissutinik unioqqutitsillutik sulinermik unitsitsineranni aningaasartuutit saqisunut akiligassanngortinniarlugit oqaatigereeraluaraa, maanna Air Greenlandip aningaasartuutit nammineerluni matuniarlugit aalajangersimavoq.
Tamanna pisortap Michael Binzerip Radioaviisimut ilisimatitsissutigaa.
- Akiliisitsiniarnitsinnut atatillugu aaqqiissutissamik nassaarniarneq ajornakusoorpoq aamma saqisut akiliisinnaanissaat ilimananngilaq, Michael Binzer oqarpoq.
Michael Binzerip aammattaaq ilisimatitsissutigaa aningaasartuutit 4 millioni koruuniniit amerlanerunissaat ilimanartoq, tassami naammagittaalliuutit, immikkut taarsiissuteqarnerit aamma pisiortorfinniit piumasaqaatit ilannguppata aningaasartuutit amerlanerussammata. Maannali aningaasartuutit qasserpiaassanersut oqaatigisinnaannginnerarpaa.
