Masarsummi angallatit issittumi atorneqaleriaannaapput
Sikulu saaligaluttuinnartoq piniarfigiunnaassagaanni, Floridami masarsoqarfimmi umiatsiarineqartartut atorneqaleriaannaapput.
Arctic Kingdom Marine Expedition-ip akilinermi Mittimatalimmi masarsunni umiatsiat angallatigineqartartut marluk misilerareerlugit iluatsilluartutut nalilerpai. Masarsunni umiatsiat angallatigineqartartut naqqi manissuupput, aqumikkut supoortulimmik ingerlasartut.
- Umiatsiap sannaa masarsukkut atorsinnaanngorlugu sanaajuvoq, sikukkoorutaasinnaasutullu tulluartupilussuulluni, Arctic Kingdom Marine Expeditionimi misileraaqataasoq Graham Dickson Nunatsiaq News-imut oqarpoq.
Misileraasut Mittimattalimmit sikup sinaanut 180 kilometerinik isorartutigisukkut ingerlaarsimapput, utimullu ingerlaarnerminni imaatigut ingerlaarsimallutik. Aqqutaani maniilakkooraangamik qamuteralannut sanilliullugu tamminnikinnerusarsimapput. Taamaattorli umiatsiat misilerarneqartut akisulaartukasiupput 425.000 koruuniniit 850.000 koruunit tungaanut akeqaramik.