Nalunaaquttap akunnerata ataatsip ingerlanerani 40.000-it oqarasuaatikkut oqaluupput
Telep oqaluttuarisaanerani nalunaaquttap akunnerata ataatsip ingerlanerani oqarasuaatikkut oqaloqatiginninnerit aatsaat taamak amerlatigisimapput. Tamanna pivoq tallimanngormat augustip ulluisa 31-anni akissarsiffiup nalaani, silagilluni, Nuummi tivolertitsisoqarluni nipilersortartullu assigiinngitsut nipilersorneranni. Nalunaaquttap akunnerani ataatsimi oqarasuaatikkut oqaloqatigiinnerit 40.000-it ingerlanneqarput. Telep tusagassiuutitigut nalunaaruteqarnermini erseqqissarpaa, aasap ingerlanerani attaveqaatit aqqutaat annertusarneqarsimammata, taamaalilluni piffissami aalajangersimasumi ataatsikkut siarnguttut tattoqisaannissaat pinaveersimatinneqarsinnaalerluni.
Septembarip novembarillu qaammataasa naaneri sapaatip akunnerisa naanerani akissarsiffiullu nalaani inissisimammata oqarasuaatikkut tattoqisaattoqarnissaa Telemit naatsorsuutigineqarpoq.
Oqarasuaatit angallattakkat attaveqaatitigullu atortut annertusarneqarnissaat siunertaralugu Tele ukiumi nutaami atortorissaarutinik tikisitsiniarpoq.
