Julie Berthelsen tusarnaartitsiartulerpoq
28-nik ukiulik Julie Berthelsen Københavnimi najugaqartoq oktoberip aallartilaarnerani nunatsinni tusarnaartitseqattaassaaq.
Julie Berthelsen nipilersortartuilu oktoberip aallaqqaataaniit oktoberip arfineq pingajuat ilanngullugu Ilulissani, Sisimiuni Nuummilu tusarnaartitsissapput.
CD nutaaq ”Asasara” tunngavigalugu tusarnaartitsinerit ingerlanneqassapput. Erinnalli cd-init nutaanngitsuneersut aamma tusarnaartitsinermi tusarnaarneqarsinnaassapput.
Ukiut tallimat maanna qaangiupput Julie Berthelsen TV-imi erinarsortartunik unammisitsinermi PopStarimik taasami ajugaaniutivinnermi peqataammat. Taamaasillunilu erinarsortartoq Danmarki tamakkerlugu tusaamaneqalerpoq.
- Aap tassa ukiut tallimat ingerlapallareerput, ullumikkut eqqissisimaneruvunga. Taamanikkummi sussanerlunga nalornissutigigakku, Julie Berthelsen raadiuaviisimut oqarpoq.
Erinarsortartoq nakorsamut ilinniarnermi nalaani erinarsornermik unammisitsinermi peqataavoq. Maanna ilinniarnini taamaatikkallarsimavaa, erinarsortartutut taalliortutullu inuuniuteqarluni.