Saqisut sulinerminnik ulluni pingasuni unitsitsereersullu Air Greenlandimi sulisut kinguartoorutitik qaangerniarlugit ulappuseruttorput.
Timmisartuutileqatigiiffiup qullersaasa Saqisullu Peqatigiiffiata ACU-mik naalisarneqartartup aallartitaasa, sulinermik marlunngormat ullaakkut unitsitsinermut tunngaviusut oqaluuseralugit ingerlatileruttorpaat.
Air Greenlandimi pisortat neriorsuutigereerpaat, ullumi ulloq naallugu aqagulu kinguaattoortut inuit 1.000-t missaanniittut tamaviaarullugit apuuffissaannukaanniarneqassasut. Nunatsinni Københavnimilu angallassinerit kinguaattoorfiusumik maanna ingerlanneqarput.
Air Greenlandip timmisartorsua Norsaq immikkut ittumik aqagu Kangerlussuup Københavnillu akornanni timmisartuussitissavaa, sinerissamilu Dash-7-it angallassissapput.
Allakkat poortukkallu amerlanersaat marlunngormalli apuunneqartussaagaluit ippassaq timmisartorsuarmit assartorneqartut aamma isumagineqassaqqaartut, Air Greenlandimi angallannermut aqutsisup Jørgen Erik Andersenip ilisimatitsissutigaa.
Angallassinerit nittartakkami www.airgreenland.gl-imi paasisaqarfiginerusinnaavatit.