Muslimit Sverigemiittut akerliussutsiminnik takutitsipput
Muuamaat qimmitut isikkulik. Eqqumiitsuliortoq Sverige-meersoq muslimit pruffiitiat taamaalillugu titartarsimavaa.
Muslimit Sverigemi Pakistanimilu najugallit utoqqatseqqusitsipput, titartaasimasorlu eqqartuunneqarnissaa piumasaralugu.
Aviisit titartakkamik saqqummersitsisimasut eqqartuunneqarnissaat aamma piumasarineqarpoq.
Muslimit Sverige-miittut akerliussutsiminnik takutitsiniarlutik nalunaaruteqarput. Tamanna tallimanngornermi qinoqatigiittoqareernerup kingorna pissasoq nalunaarutigineqarpoq.
Sverigemi iloqarfiit ilaanni Örebromi muslimit akerliussutsiminnik takutitsipput, Örebromi aviisip muuamaat qimmitut isikkoqartillugu titartagaq saqqummersissimammagu akerliussutsimik takutitsisoqarpoq.
Aviisip aaqqissuisuata Ulf Johansson-ip saqqummersitsisimanertik illersorpaa, killiligaanngitsumik oqaaseqarsinnaatitaaneq suaarutigalugu.
Inatsisilli pioreersut allanngortinneqarnissaat muslimit piumasaraat.
Tamanna Ulf Johanssonimit illuatungilerneqarpoq.
Aviiserujussuit Dagens Nyheter aamma Aftonbladet muuamaamik titartagaq saqqummersippaattaaq.
Tamanna Iranimit Pakistanimillu arajutsisimaneqanngilaq, Iranillu præsidentiata Mahmoud Ahmadinejad-ip oqaasii naapertorlugit juutit tamatumunnga pissutaapput.