Nunatta qeqqani kommunini innuttaasut toqqaannartumik aluminiumik aatsitsiviliorsinnaanermut tunngasunik ulluni tulliuttuni apeqquteqarsinnaapput. Tassami ingerlatseqatigiiffiup ALCOA-p sulisui, Sisimiuni, Nuummi Maniitsumilu borgmesterit peqatigalugit innuttaasunik ataatsimiisitsissapput.
Suli nalunaraluarpoq ilumut nunatsinni aluminiumik aatsitsiviliortoqarsinnaanera.
- Misissuinerpassuit, ALCOA-p sumi qaqugulu aatsitsivissualiorsinnaanissaanut tunngaviusussat maannakkorpiaq ingerlanneqarput, ataqatigiissaarisoq Laust Løgstrup aviisimut Sivdlek’-mut oqarpoq.
Innuttaasut aggialluarnissaat ilimanarmat, Sisimiuni innuttaasut ataatsimiinnissaat mini-hallen-mut inissinneqarpoq. Nalunaaqutaq arfineq-pingasut qeqqanut aallartissaaq, tikilluaqqusisuussaalluni borgmester Hermann Berthelsen.
Amerikamit ingerlatseqatigiiffissuanit ALCOA-meersut suliffeqarfik, erngup nukiliorfiit aamma aatsitsiviit kiisalu avatangiisitigut, inuuniarnikkut peqqissutsikkullu nalilersuinerit saqqummiutissavaat.
Alcoa aqagu Nuummi aqaguagulu pingasunngornermi Maniitsumi innuttaasunik ataatsimiisitsissaaq.