Kina aamarsuarnik atuisuugallassaaq

Kina siunissaq ungasinnerusoq isigalugu aamarsuarnik suli atuisuusariaqarpoq, tassa aningaasaqarniarnerup annertusiartuinnarnerata kingunerisaanik suliffeqarfissuit nukissiorfiillu aamarsuartortariaqarmata.

Gassimik CO2-mik Kinami aniatitsineq taamaasilluni annertugallassaaq, USA-milu aniatitsinerit aappaagu qaangerneqassangatinneqarlutik.

Avatangiisit pillugit Norge-p avannarpasissuani Ny Ålesundimi isumasioqatigiittoqarpoq, Kinamilu aamarsuartornerujussuaq pillugu saqqummiussisoqarluni.

- Kinami nukissiuuteqarniarnermi aamarsuit isumalluutaasorujussuupput, nunallu taamaattumik isumalluutillit ikittuaraannaallutik, Yui Ruisheng, Kinami avatangiisinit illersorneqarnissaat pillugit pisortaqarfimmeersoq, Tuluit nutaarsiassaqartitsiviannut Reutersimut taama oqarpoq.

Nukissiorfiit suliffeqarfissuillu Kinamiittut 70 procentii aamarsuarnik atuisariaqartarput, nunanilu allani suliffeqarfissuit nukissiorfiillu 30 procentii aamarsuartortuullutik.