Peqatigiiffik Tikiusaaq pilersinneqarpoq

Oqariartaaseqarpoq pingajussaaninngooq iluatsittartoq, tamannalu aamma Qaqortup kommuniata misigaa, tassami peqatigiiffimmik meeqqat inuusuttullu atugaannik pitsanngorsaasussamik aallartitsiniarnermini pingajussaanik innuttaasunik aggersaanermini iluatsitsimmat.

Peqatigiiffik ”Tikiusaaq”, ippassaq aggustip ulluisa 15-iani pilersinneqarpoq.

Siulersuisunngortuni siulittaasunngortup, Bent Sandip peqatigiiffimmik aallartitsineq iluarisimaarpaa, aallartilluariarunillu, innuttaasunik sapinngisamik siammasissumik ilaasortassarsiornissartik siunniussimanerarlugu.

Peqatigiiffiup siunertaraa Qaqortup illoqarfiani meeqqat inuusuttullu ilorrisimaarlutik, akisussaassuseqarlutillu innuttaaqataanissaat anguniarlugu peqatigalugit suliniuteqartarnissaq. Ilaatigut illumik namminneq aqutseqataaffissaminnik pilersitsinissaat anguniarneqarluni.

Ilaqutariit arfineq-pingasut inuillu ataasiakkaat arfinillit ilaasortanngoreerput.