Karl Rove Bushimut siunnersortitut tunualerpoq
Karl Rove, USA-mi præsidentip Buship naalakkersuinermik suliaqarnera tamakkerlugu, qaninnerpaamik naalakkersuinikkut siunnersortaasoq, Amerikami aviisimut The Wall Street Journal-imut oqarpoq aggustip 31-anni tunuarniarluni.
Angut taanna taaneqartarpoq “Bush’s brain” – “Buship qarasaa” aamma Buship nammineerluni taanikuuaa “siunnersuillammassuaq”, tamatumunnga pissutaavoq 2004-mi qineqqusaarneq, Buship qinigaaqqinneranik kingunilik taassuma aaqqissuunnikuummagu. Karl Rove 1993-imili George Bush Texasimi Guvernørinngornissaminik anguniagaqalermalli Buship siunnersortaasa akornanni pingaarnerpaasimavoq.
Karl Rove akerlilersortiminit qineqqusaariaatsimik peqqarniitsumik sunniuteqarluartumillu ingerlatsisutut taaniarneqartarpoq, qanorluunniit iliornissaminut nangaassuteqartanngitsutut, naak iliuutsini inatsisinik unioqqutitsinertut isigineqassagaluarpataluunniit. Bushimut inuusunnerusumut siunnersortinngunngikkallarami marloriarluni Republikanerit partiiannit Bushimit angajullermit soraarsitaasarnikuuvoq.
