Amerikamiut aallasaat 180.000-it Irak-imi tammarput

USA-p 2003-miili aallaasit 180.000-it aaqanngitsullu eqqornaveeqqutit aqerlunit pitarneqarsinnaanngitsut Irakimi amerikamiut sakkutuuinut nassiunneqartartut sumut pisarsimanersut misissorneqalerpoq.

Irakimi pikitsitsiniat sakkussianik ulikkaarput. Sakkussiallu amerlaqisut qularutissaanngitsumik amerikamiunit pissarsiarineqartarsimassapput, amerikamiut sakkussiaatiminnik qanoq paarsinissartik aqussinnaasimanngilaat, taamaammallu Irakimiut sillimaniarnikkut politeeqarnikkullu sakkutuuinut sakkussianik paarisaqarneq tunniussimallugu.

Ukiut tallimat ingerlaneranni USA-p 150 milliardi koruuninik ikinnerunngitsut sakkussianik pisiniutigisimavai. Kongresimiillu nakkutilliinermik misissuisuutitap nassiussuineq pissusissamisut ingerlanersoq misissulermagu, paasinarsivoq sakkussianik nassiussuisarneq aarleqqutissartaleru-jussuusoq, taama DR-mi nutaarsiassaqartsitsivik paasissutissiivoq.

Aallaasit 180.000-it maannamut tammarsimapput. Amerikamiut illersornissamut ministeriaqarfianniit ilisimaneqanngilaq aallaasit juni 2003-miit 2005-imut nassiunneqartartut sumut pisarsimanersut.

Sakkussiat tammaaneqarsimasut saniatigut eqqornaveeqqutit aaqanngitsut aqerlunik pitarneqarsinnaanngitsut niaqorornaveeqqutillu 100.000-ilikkuutaat aamma tammaaneqarput.

Amerikamiut illersornissakkut ministeriaqarfianni qaffasissumik atorfillit ilaat ullumi Washington Post-imut, oqarpoq, sakkussiat ilai allaqqussinnaanngitsumik amerikamiut sakkutuuinut atorneqartarsimassasut.