Nanuaraq sanigorsartinneqalersoq
Nanuaraq arnaarsernikoq Knut Tysklandimi illoqarfiit pingaarnersaata Berlinip uumasuusivissuaniittoq nunarsuarmi marsip qaammataani tusaamasarsuanngorpoq.
Uumasoq taamaattoq assannik paarsarineqarluni perorsarneqarnissaa pissusissamisuunngitsoq uumasut illersuiniaqatigiivineersut oqaatigaat, toquinnarneqarnissaalu piumasarineqaraluarluni.
Knut nerisarissaangaarmat maanna alliartupiloortoq uumasuusivissuarmi sulisut nalunaarutigaat, nanuaraajunnaariartormallu pualavallaalersimammallu sanigorsartinneqalerpoq.
Maannamut nerisartagarisamasai tassaanerusimapput iffiukkat croissant-it aalisagarpassuillu.
Sanigorsartinniarluguli taarsiullugu immummik kinertuliamik nerisinneqartalissaaq, vitamininillu tunineqartalissalluni. Saarulliup tinguata iginneranik aamma nerisinneqartalissaaq.
Knut ullormut sisamariarluni nerisarsimagaluarpoq, maannalu pingasoriarluni neritinneqartalissalluni.
