Kapisilinniarneq ullumi aallartippoq
Kapisilinniarneq ullumi aallartippoq qaammatini pingasuni ingerlanneqassalluni.
KNAPK isumasioqatigereerlugu aggustip aallaqqaataaniit oktobarip naanerata 2007-ip tungaanut kapisilinniartoqarsinnaasoq, aalisarnermut piniarnermullu pisortaqarfik nalunaarpoq.
Naalakkersuisut siornatut aalajangerput nammineq atorfissaqartitanik aamma inuussutissarsiutigalugu aalisartunut – kalaalimineerniarfinni najukkanilu suliffeqarfinni, assersuutigalugu napparsimmavinni, akunnittarfinni, sutorniartarfinni, atuarfeqarfinni allanilu tunisassanik - kapisilinniarniartoqarsinnaassasoq.
Tuniniaassagaanni akuersissummik peqarnissaq piumasaqaataavoq. Kapisilinniarnissamullu akuersissut kommunimi qinnuteqaatigineqassaaq.
Inerteqqutaavorli aalisakkerivinnut kapisilinnik tunisisinnaaneq kiisalu kapisilinnik avammut nioqquteqarnissaq tamarmi. Taamatut aalajangernermut pissutaavoq Atlantikup Avannarpasissuani kapisilinnit pissamaatinik nungusaataanngitsumik iluaquteqarnissaq.
Piumasaqaataavortaaq aalisarneq tuniniaanerlu tamarmiusoq aalisarnermik nakkutilliisoqarfimmut KANUAANA-mut nalunaarutigineqassasoq. Nalunaarsuinermut immersugassaq kommunimi imaluunniit Namminersornerullutik Oqartussat nittartagaanni nanoq.gl-imi pissarsiarineqarsinnaavoq.
