Kalaallit Tivolimi naapeqatigiipput
Kalaallit Tivolimi naapeqatigiinnerat ullumi aallartippoq, aggustillu aallaqqaataa ilanngullugu pilersaarusiortoqarsimalluni.
Arnaq qajartortartoq Tivolip tasiani ullumi takutitsissaaq, erinarsortartullu Angu aamma Kimmernaq tusarnaartitsissallutik.
Arnannguaq Gerstrømimik peqataaffigineqartussamik erinniarsuarnik aamma tusarnaartitsisoqassaaq, ilisarisitsisartussallu ukioq manna nutaajupput. Carsten Siegstad aamma Maja Motzfeldt, Air Greenlandimeersoq, aliikkuersuisunik ilisarisitsisartuussapput.
Pisianiarfeeqqat aamma pilersinneqarsimapput, kaffillertoqarlunilu umimmaap neqaanik kebabilianik pisiniartoqarsinnaassalluni.
Ukioqatitit aamma naapissinnaassavatit. 1946-mi inunngorsimasuniit 1965-imi inunngorsimasut neriniartarfimmi ”Grøften”-imi naapinneqarsinnaassapput, 1966-imilu inunngorsimasuniit 1975-imi inunngorsimasut Restaurant ”Perlen”-imi naapinneqarsinnaassallutik.
1976-imi inunngorsimasuniit 1985-imi inunngorsimasut Restaurant ”Påfuglen”-imi naapinneqarsinnaassapput.
