Naapertuilluarneq aqqutigalugu akisussaaffinnik agguataarinninniarput

Sisimiuni Maniitsumilu Inuit Ataqatigiit isumasioqatigeeqqammerput, kommunerujussuanngornissamullu piareersaatit assigiinngitsut sammineqarput.

Kommunillu taakku marluk kattunneranni naapertuilluarneq qulequtarineqassasoq isumaqatigiissutigineqarpoq.

Kommunimut nutaamut tunngatillugu oqartussaaffiit akisussaaffiillu agguataarneqarnissaat ullutsinnullu naleqqussarneqarnissaat siunniunneqarpoq, akisussaaffinnik agguaanermi naapertuilluarneq pingaartinneqarpoq. Maniitsumi Sisimiunilu Inuit Ataqatigiit taama allapput.

Innuttaasut oqartussaaqataanerat qulakkeerniarlugu sinniisut atorluarneqarnerunissaat suliniutigineqarniarpoq, nunaqarfinnilu tamani sinniisunik pilersitsinissaq aqqutiginiarneqarluni.

Inunnik isumaginninneq kommunerujussuanngortussami pingaarnerpaatillugu ineriartortinneqassasoq Sisimiuni Maniitsumilu IA-mit pilersaarutigineqarpoq, innuttaasullu sapinngisamik amerlanerpaat sulisinnaanngorsarneqarnissaat siunniunneqarluni.

Kulturi aamma arajutsisimaneqanngilaq:

- Isiginnaartitsisarneq eqqumiitsuliornerlu inuiattut kinaassutsimik pilersitsiviusarpoq, taamaammat isiginnaartitsinikkut pissutsit aaqqiivigineqartariaqarput, Qeqqani IA allappoq, isiginnaartitsisartut filmiliortartullu atugaat ukiuni arlalissuarni sumiginnagaasimasutut oqaatigalugit.