Aqqaluk Lynge-p tuluit inatsisartuini oqalugiarnera aalassassimaarutigineqartoq
Tuluit inatsisartuini overhusimi ilaasortap Inuit inooriaasaata ulorianartorsiortinneqarnera aalassassimaarutigaa. Viscount Simon neriuppoq paasissutissat silaannaap kissakkiartorneranut tunngasut inatsisatut illorsuanni siammaatissasut taamaalillutillu aamma tuluit nunaata sinneranut ingerlanneqarsinnaaniassammata.
Taama oqarpoq Viscount Simon, taassuma taaguutini Viscount ilaquttaminit kingornutaraa taamaalillunilu overhusimi inatsisartuni Londonimi illorsuaqartuni, ilaasortaalluni.
-Assut aalassassimavunga, tusarlugu inooriaasersi allanngortilluinnartariaqarassiuk, Radioavisimut oqarpoq Aqqaluk Lyngep oqalugiareernerata kinguninngua.
Underhusimut qinikkat tamarmiugaangamik 659-issiusartunit, arfinillit tusarniaanermi tusarnaarput, overhusimilu ilaasortanit 700 -sunit ataaseq Aqqaluk Lyngep issittumi inuuniarnermik oqaluttuarneranik tusarnaarluni.
Viscount Simon baronimit qaffasinnerusoq Jarlimillu appasinnerusoq, paasissutissat silaannaap kissakkiartornerata kingunerisaanik ajornartorsiutinut tunngasut inatsisartut illorsuanni siammaannissaat neriutigaa.
- Inatsisartuni ilaasortat tusarnaartut ikippallaarujussuarput, nammineq paasissutissanik siammarterisinnaassusera tamakkerlugu siammarterissaanga, neriuppunga ilaasortanut paasissutissat siammartissasut taamaasillutik aamma tuluit nunaata sinneranut siammaanniassammata, Viscout Simon oqarpoq. Taassuma aamma oqaatigaa nammineq 1990-imili timmisartorami timmisartoqqissimanani, timmisartut CO2-mik aniatitsinerat annertuallaaqimmat.
Tuluit Nunaanni 60 millionit missaannik inulimmut, tassani Skotlandip, Walesip aamma Irland avannarlip inui naatsorsuinermi ilaatinneqarput Overhusimi ilaasortat taasisinnaatitaanngikkaluarput politikkimut sunniuteqarnerat qularutissanngilaq.
