Kuummiuni tunitsivik tallimanngorpat ammassaaq
Kuummiuni aalisakkanik tunisassiorfik tallimanngorpat juulip ulluisa 27-anni ammassaaq. Taama Arctic Prime Productionimi siulersuisut ataatsimiinnerminni aalajangerput. Tunisassiorneq akilersinnaanngikkaluartoq aallartissaaq, naak pisassiissutinik Namminersornerullutik Oqartussallu suli isumaqatigiittoqanngikkaluartoq. Pisortaq Kim Høegh-Dam Kuummiuni tunitsivik pillugu ima oqarpoq.
-Siulersuisut piumaffigigaminnga tunisassiorfik taanna ammassagutsigu taava akilersinnaassusia qulakkeertariaqaripput, kisianni piviusut aallaavigalugit taanna qulakkeersinnaanngilarput. Periarfissinneqarpugulli, Kuummiuni eqqaanilu aalisartunit pisariaqartinneqarmat piffissaligaanngitsumi, ammaqqissagipput, Kim Høegh-Dam nassuiaavoq.
Tunisassiorneq tulaarneqartartut ikippallaaqimmata akilersinnaanngilaq. Arctic Prime Production A/S-illi neriuutigaa Tasiilap Kommunea aamma Namminersornerullutik Oqartussat paaseqatigalugit fabrikki pisassinneqarsinnaassasoq, tassa piginnittut namminneq aalisariutaataasa namminneq tulaassassaannik.
- Innuttaasut sallunaveeqqutitut tigummerusunnginnatsigit pisassinneqanngikkaluarluta ammarniarparput. Ammartikkusullugu uteriiseramik. Akilersinnaangitsumik ingerlassasoq nalunngilarput, neriuppugulli paasilluarluta tulaassuiniartut aalisarluassasut, pisortaq ilisimatitsivoq.
Tunisassiorfiit Aasianni Qaqortumilu ittut Polar Seafood-ip piginneqataaffii siorna 600 tonsinik “allokeret kvote”-nik taasanik pisassinneqarput.
- Tassunga assingusumik pisariaqartitsissaagut, pisortaq Kim Høegh-Dam naggasiivoq.
Kuummiut fabrikkiani aalisakkat suulluunniit Tasiilamit nunaqarfiinillu tigooqqarneqassapput, pingaartumik saarulliit qalerallillu. Arctic Prime Production A/S-p naatsorsuutigaa pisassiissutit pillugit Namminersornerullutik Oqartussaniit qaammatit marlussuit qaangiuppata tusagaqassallutik.