Tasiilami isertitsivik Danmarkimi ombudsmandip isornartorsiorpaa
Parnaarussanut Tasiilami atugassarititaasut ima ajortigaat, Danmarkimi ombudsmandi maanna akuliuttariaqalerluni. Nutaarsiassaqartitsivik Ritzau naapertorlugu atuagassiaq Kristeligt Dagblad taama allappoq.
Isertitsivik pingasunik initaqarpoq isersimaartarfeqarlunilu, taakku tamarmik immikkut 6 kvadratmeterinik angissuseqarput. Ineeqqat tamarmik aalakoortunut silattorserfissatut naatsorsuutaagaluarput. Amerlanertigulli inuit marluk/pingasut piffissami sivisuumi ineeqqami parnaarsimasumiissinnaasarput. Taakku tassaasinnaasarput pinerluutigisimasaat misissorneqartut, piffissami aalajangersimasumi pineqaatissinneqarsimasut, kiisalu imigassartorsimasut. Ulluni katillugit 334-ni ullut taamaallaat aqqanillit isertitsivik amerlavallaanik inoqarsimanngilaq, tassa Danmarkimi ombudsmandip misissuinerata nalaani.
Ombudsmandi Pinerluuteqarsimasunik Nakkutilliisoqarfiup Pisortaqarfianut saaffiginnissimavoq, pinerluuteqarsimasunulli Kangerlussuarmi inissiisarfiugallartussat 60-it Pisortaqarfiup innersuussutigisimavai. Kangerlussuaq Tasiilamiit 600 kilometerinik ungasissuseqarpoq. Ombudsmadillu nakkutilliisartuisa qullersaata, Lennert Frandsenip, innersuussutigineqartoq naapertuutinnginnerarpaa.
