Kommunerujussuanngortussat ataatsimeersuarnermi qitiussapput
Partii Siumut immikkut ittumik tallimanngorpat tulliani juulip 27-iani ataatsimeersualerpat, siulersuisuunernik qinersisoqartussaangikkaluartoq, kommunerujussuanngortussani sisamaasussani Siumup siulersuisussaanik qinersisoqassasoq, immikkut ittumik ataatsimeersuarnissami oqaluuserisassatut pilersaarutini takuneqarsinnaavoq.
Kommunerujussuanngortussani Siumup siulersuisussai immikkut ittumik ataatsimeersuarnermi toqqarneqareersimasussaassapput, kommunerujussuanngunngortussanut kommunalbestyrelsimut qinersinissaq taamaalilluni nalorninaatsumik piareersarneqarsinnaaniassammat.
Kommunerujussuanngortussani Siumup siulersuisussaanik qinersinissaq pillugu sukumiinerusumik paasissutissinneqarsinnaasimanngilagut.
Siumup immikkut ittumik ataatsimeersuarnerani anguniakkat nutartikkat ilanngullugit saqqummiunneqassapput, oqaluuserineqarlutik taasissutigineqassallutillu.
Siumup anguniagassatut saqqummiussassai nutaat nunatta namminersulernissaannut, kommunerujussuillu sisamaannanngornissaannut tunngassuteqartussaasapput.
