SMS-ikkoorlugu kalaallisut ilinniartoqarsinnaalissaaq

SMS’ikkoorlugu kalaallisut ilinniarit, qarasaasiatigullu suleqatigiinnikkut kalaallisut ilinniarit. Ilinniarfik najornagu aamma ilinniartoqarsinnaassaaq, tassa Nuummiikkaluaruit, Nanortalimmiikkaluaruit Narsamiikkaluaruilluunniit qarasaasiap saavanut ingiinnarlutit kalaallisut ilinniarsinnaalissaatit.

Oqaatsinik Pikkorissarfik Sisimiuniittoq qarasaasiatigut kalaallisut ilinniarnissamut atugassamik programiliuleruttorpoq, ilinniarfillu najornagu kalaallisut ilinniarnissamut atugassiaassalluni. Taamatut ilinniartitsisarneq danskisut e-læring-imik taaneqartarpoq, taamatullu ilinniartitseriaaseq periarfissarpassuaqartoq, e-læring-imut siunnersortip Barfuss Ruge-p oqaatigaa:

- Sungiusagassat qarasaasiatigut pineqartarput, oqaaseqatigiiliornermillu sungiusartoqartarluni. Suliffimmiitsilluni kalaallisut ilinniartoqarsinnaassaaq. Ilinniartitsisut peqatigalugit sineriassuaq tamakkerlugu ilinniartoqarsinnaassaaq, Barfuss Ruge oqarpoq.

Sungiusagassat kikkunnilluunniit pineqarsinnaassanngillat, oqaatsinilli pikkorissartitsinerni peqataasimagaanni aatsaat sungiusagassanik pisoqarsinnaavoq, Barfuss Ruge erseqqissaavoq.

Sungiusagassat assigiinngitsut SMS-ikkut ullut tamaasa aamma pineqartalersinnaassapput, taamaaliortarnissarli attanneqassanersoq nalunarallarpoq, aallaqqaammullu misileraanertut atassalluni.