Radioaktiviusumik aniasoqarsimasoralugu misissuisoqarpoq
Japanimi nuna ippassaq sajoreersorlu nunap avannaq-kippasissortaaniittumi Kashiwasakimi atomimik nukiliorfik misissuiffigineqalerpoq.
Radioaktiviusunik aniasoqarsimanersoq misissorneqarpoq. Japanimi nutaarsiassaqartitsivik Kyodo taama allappoq.
Nappartat radioaktivinik igitassallit 100-t missaanniittut nuna sajummat uppikaatitersimasut nukiliorfimmi sulisut paasisimavaat.
Nappartat quersuarmiitinneqarsimapput, quleriiaarlugillu inissinneqarsimallutik. Nappartat ilaasa matui ammarsimasut aamma paasineqarpoq. Nappartat uppikaatitersimasut sulisut ilaata uppernarsarpaa, radioaktiviusunimilli aniasoqarsimanersoq oqaatigerusunnagu.
Nunap sajunnera Richterip uuttortaataa malillugu 6,8-mik saskkortussuseqarpoq, inuillu qulingiluat ajunaarsimasut maannamut nassaarineqarsimapput.
