Aleqa Ittuk pisiaraat

Umiarsuaatileqatigiiffiup Disko Linep, Ilulissaneersup Jørgen Kristensen suleqatigalugu, Aleqa Ittuk pisiaraat.

Disko Line Ilulissaniit ingerlanneqarpoq, angallannermilu Namminersornerullutik Oqartussanut kiffartuussinissamut 2006-imiit 2010-p tungaanut isumaqatigiissut, taamaasilluni pitsaanerulissasoq, Disko Line allappoq.

Aleqa Ittuk 36-nik ilaasoqarsinnaavoq, taassumalu saniatigut Najaaraq Ittuk 60-inik ilaasoqarsinnaasoq, aammalu Aviaq Ittuk 36-inik ilaasoqarsinnaasoq atorlugit, Qeqertarsuup tunuani angallassineq ingerlanneqartalissaaq. Taassuma saniatigut Eqi-mut aammalu arfernik takornarianut angallassisoqartalissaaq.

Aleqa Ittuk Ilulissaniit Qeqertarsuup tungaanut utimullu aammalu Ilulissaniit Qasigiannguanut Aasiannut utimullu angallassisalissaaq.

Aleqa Ittuk aamma Kangianut takornariartitsisarnissanut attartorneqarsinnaassaaq. Angallannermut allannguutaasut qanittumi Disko Linep nittartagaani takuneqarsinnaalissapput.