Okalik Nunavut-mi ilungersunartorsiorpoq
Nunavut-mi naalakkersuisut siulittaasuusoq Paul Okalik atorfimmini ilungersunartorsiorpoq, arnaq Nunavut allattoqarfiisa ilaanni pisortaq nikanarsarlugu oqarsimareerluni. Nunatsiaq News allappoq.
Labradorimi nerersuaqatigiinnermi Okalik-up pisortaq Lynda Gunn pillugu ima oqarsimaneragaavoq:
-Maaniuna arnapalaaq aamma susoq.
Paul Okalik oqaaserisimasani pillugit utoqqatseqqusaagami utoqqatsereersimavoq, oqarluni oqaatsit atukkani soorunami akuerineqarsinnaanngitsut.
-Kisiannimiuna sapaatip-akunnera taanna uannut artornarsimasoq, nassuiaavoq.
Lynda Gunnilli utoqqatsissut akueriumanngilaa. Nunavut-mi arnat peqatigiittulli isumaqarpoq, Paul Okalik Nunavut-mi naalakkersuisut siulittaasuattut tunuartariaqarpoq.
- Okalik-up atorfimmik taama qaffasitsisisumi atorfeqarluni imminut aqussinnaannginnini takutereerpaa, tunuartariaqarpoq, Lynda Gunn oqarpoq.
Nunavut-mi inatsisartut aasaanerani sulinngiffeqartut maanna piumaffigineqarput, Paul Okalik tunuassanersoq naliliiffigeqqullugu.