Quest Qeqertarsuup eqqaani sapaatip akunnerani kingullermi ikkarlimmat inunnik avatangiisinilluunniit ajoqusertoqanngilaq.
Umiarsuulli naalagaata misilittagaqarluartup sukkaatsumik ingerlalluni ikkarlissimanera nassuiaatigineqanngilaq, eqqartuussivimmilu killisiuisoqassagunanngilaq.
Sermitsiaq ullumi saqqummersoq taama allappoq.
Siornatigut Disko II-mik ateqartinneqarnikoq Quest maanna Quest Owner Limited-imit pigineqarpoq, suliffeqarfillu taanna Clipper Group-ip Bahamas-imeersup pigisaraa.
Umiarsuarmik suliffeqarfimmillu piginnittuuvoq International Shipping Partners, naatsunngorlugu ISP, ISP-p pisortaa Niels-Erik Lund ilaasortaammut Scandinavian Star-imut attuumassuteqarnerarneqartoq taama ilisimatitsivoq.
Nittartagaq ScandinavianStar.com naapertorlugu Niels-Erik Lund SeaEscape-imik Scandinavian Star-imik 1990-imi ikuallammat inuit 158-it ajunaarutigisaannik, piginnittutut allassimavoq.
Qeqertarsuup eqqaani pisimasup nassuiaatigineqarnissaa ISP-p kissaatigineraa Sermitsiap paasiniarsimagaluarpaa, Niels-Erik Lundili oqaaseqarusussimanngilaq.