Rusland USA-mik siorasaarivoq
USA-p Rusland ataatsimut raket-inut illersuusiornissamut suleqatigerusunngippagu, Østersøp sineriaani raket-ilersuissalluni Rusland siorasaarivoq, raket-illu Europa-mut igeriuttariaassasut oqaatigalugu.
præsident Vladimir Putin præsident George Bush-imut sapaatip akunnera una suleqatigiinnerulernissamut siunnersuuteqarpoq, Raket-inut illersuusiornissamut nunanut inupiluuserniartartulinnut illersuutissanik tunngasumik. Præsident Putin oqarpoq Aserbajdsjan-imi radar-eqarfeqartoq atorsinnaasunik. Taamannalu ajussappat Rusland-ip siunnersuutigaa, Rusland-ip kujataani radar-eqarfiliortoqarnissaa. Taamaammat præsident Putin isumaqarpoq USA-p raket-inut illersuusisap ilaa Polen-imi Tjekkiet-milu sanasariaqanngikkaa.
Rusland-imi præsidentip tullersortaa Sergei Ivanov-i toqqaannanngitsumik siorasaarivoq, USA suleqatigiinnissamik akuersippat taava Rusland-i imminut illersorniarluni Rusland-ip kitaani Kaliningrad-imi raket-ilersortariaqassanani, Sergei Ivanov oqarpoq. Kaliningrad-i Østersø-p eqqaani inissisimavoq, Europa-llu nunaannit Polen-imit Litauen-emillu unguneqarsimalluni.
Oqaatigineqartut siorasaarutitut paasineqarput, USA-lu suleqatiginnikkusunngippat taava Kaliningrad-imi raket-eqalissasoq, Europa-mullu taakku sammissallutik. Rusland-ip siusinnerusukkut oqaatigereerpaa USA kisimiilluni Europami raket-inut illersuusiussappat aarlerisaarneqartut misigissallutik.
Præsident Bush-ip Rusland-ip siunnersuutaa maannamut nassaarsiullaqqittutut naliliinnarpaa, aaliungiusimallugulu raket-inik illersuusiassaq Europa-p kangiani sananeqassasoq.