Premierministerit Iqalunni ataatsimiipput

Canadami nunap immikkoortuisa siuttui Nunavumi ulluni makkunani ataatsimiipput, Nunavumilu taamatut ataatsimiisitsineq siullermeersumik pivoq.

Nunap immikkoortuini siuttut premierinik taaneqartartut sisamat territoriallu marluk siuttui ataatsimeeqataapput.

Ataatsimiinnerit ippassaq aallarnerneqarput, Nunavullu premieriata Paul Okaliup neriuutigaa premierit allat siuttullu allat Iqalunniinnerminni Nunavumi ajornartorsiutit suunersut ilisimasaqarfigilissagaat.

- Imaaliallaarnarlutimmi illoqarfitsinnit qimagussinnaanngillat, Paul Okalik qungujulaajutigaluni aviisimut Globe and Mail-imut oqarpoq.

Nunavumi illoqarfiit amerlanersaat nunatsinnisut ipput, tassa silaannakkut immakkullu kisiat avammut attaveqaramik.

Tikeraartini mattattortinneqarnissaat Okaliup qilaanaaraa, eqaluillu tuttullu pisarineqaqqammersut sassaalliutigissallugit aamma qilaanaaralugu.

Pingaaruteqarnerusunilli aamma pisoqassaaq, tassa silap allanngoriartornerata kingunerisinnaasai sammineqassapput, Canadallu oqartussaasuinit akisussaaffinnik tigusiartuaarnissaq sammineqartunut ilaassammata.